BlaBlaCar Daily : an tolpad a laka bec’h evit ar c’henweturiñ

Blabla-fred-toutou, setu standur nevez labourizion a-yoc’h en tolpad a-c’houde miz Gwengolo pa oa komañset an taol-lañs-se àr ar c’henweturiñ. Evit distankiñ an hentoù darempredet ar muiañ d’an eurioù barr hag evit demokratelaat ar mod vertuzus-se, kuit a vout e-unan en e oto, e oa bet an tolpad é keveliñ get an arload hezoug BlaBlaCar Daily.  

Hentadoù lieskementet dre bevar

Evit pep beaj en unan a gumunioù an tolpad enta, evit monet pe donet en-dro, ha mar bez graet dre ar savenn e vo gopret ar bleinour ha kouviet an treizhad. Berzh en deus graet an taol atiziñ-se rak a-c’houde penn-kentañ an oberiadenn-se emañ bet lieskementet an hentadoù dre bevar e-skoaz ar mem prantad àrlane hag ar 26 leur-genweturiñ zo bet darempredet muioc’h.

Tolpad Mor Bihan Gwened zo unan ag ar strollegezhioù kentañ é vonet àr-raok dorn-ha-dorn get an arload arbennik àr hentadoù ar pamdez (edan 80 km).

Lod zo krog dija da eskemm beajoù, evel Marion, gopret get ar gevelouri Cab e Pleskob. « Graet em boa anavedigezh get an arload-se da vare sizhuniad an dilec’hiiñ. Doc’htu àr-lerc’h em boa klasket tremen dre an arload ha merzhet em boa e oa ur c’henlabourer din hag a rae ar mem hent ! Bras eo an espern argant a-c’houde miz Gwengolo, na bout n’hon eus namet 10 munut hent. Dreist-holl pa vez roet 100 euro get ar Stad d’ar re nevez-enskrivet. Hag er mod-se hon eus graet gwell anavedigezh an eil get egile ! »

Evit roiñ da anavet an afer vat-se eo bet Marion hag he embregerezh é kouviiñ ur baread BlaBlaCar Daily en o savadurioù. Donet a ray edan berr da ginnig un abadenn evit dedenniñ ar muiañ a genlabourizion ar gwellañ.

Merzhet he deus Marion ne oa ket ken stanket parklec’h he embregerezh ivez dre an arbenn ma vez lod kenlabourizion é kenwenturiñ.