Site Web de Golfe du Morbihan - Vannes agglomération

Diwezhañ

Ur raktres nevezus ? Dait da Incub’Activ !

Ekonomiezh
02/01/2022
Ur raktres nevezus ? Dait da Incub’Activ !
Er penn-kentañ, ar soñj hag an c’hoant da sevel o embregerezh dezhe o-unan. Setu petra a oa e penn an dud kent bout lodek en Incub’Activ, anezhi ur c’horerez mennadoù harpet get an tolpad-kêrioù, e kenlabour get an Teknopol VIPE.

Thibault hag e genseurted ag ar 4vet blezad ag Incub‘Activ em gav bep sizhun, a-c’houde miz Gouel-Mikael, evit prantadoù stummiñ e ti embregerezhioù ar Prism. Arbennigourion a bep seurt a za d’o sklêrijenniñ a-ziàr ar berc’henniezh intelektuel, ar strategiezh kenwerzhel, ar business plan, lodenn ar gwir pa grouer embregerezhioù ha traoù arall c’hoazh. Ar Meurzh hag ar Yaou a vez gouestlet d’an evezhiiñ hiniennel. « Re ar c’horerez » zo etre 25 ha 55 blez. Hentadoù, profiloù ha mennadoù disheñvel o deus. Dre ma nend int ket niverus e c’hellomp o ambroug hag o aliiñ en ur zoujiñ ar muiañ ar gwellañ d’o c’hoantoù », eme Caroline Cario, e penn ar stignad e VIPE.

Seveniñ e raktres… pe pas

E-pad oc’hpenn 3 miz e vez peurlipet o raktres get « re ar c’horerez », àr dachennoù ken liesseurt hag an agrobouederezh, ar gwir, ar bageal peotramant an ostilhoù skoazell d’ar c’hoskor evit ar pezh a sell doc’h Thibault. « Me ‘garehe kinnig meziantoù evit ma vo harpet gwell ar c’hopridi ha ma c’hellint bleuñviñ en embregerezh ha bout a-barzh an taol », eme ar paotr yaouank.

Pa vo disoc’h ar goradur e fin miz Genver, e vo ret dezhe difenn ur gwir raktres ha n’eo ket ur mennad hepken. Lod - 70% anezhe well-wazh - a choazo kenderc’hel àr-lerc’h, re arall a cheñcho hent pe a chomo a-sav. « Ma nend a ket ar raktres betek penn ne vo ket gwelet evel ur c’hwitadenn. Ar c’horerez a servij ivez da verzhiñ emañ dijaoj ar raktresoù, eme Sophie Le Douarin ag an 2vet blezad ag Incub’Activ. Pa ‘m boa divizet seveniñ ma raktres e oan seder dre ma oa bet daeet ha gwiriet a-fet an traoù a bouez. Un dra rekis e oa evidon e-raok komañs fardiñ. ». Bremañ emañ Sophie e penn Acti’buy, un embregerezh savet e miz Gwengolo 2021, staliet e ti embregerezhioù ar Prism hag a ginnig d’al lunedourion gwellaat askorusted o stal dre zielfenniñ o frenadennoù hag implij ostilhoù sturiiñ a-ratozh.