Site Web de Golfe du Morbihan - Vannes agglomération

Diwezhañ

Gwened Dasson jazz, sonerezh e pevar c’houlz

Sevenadur
05/01/2024
in
Setu oc’hpenn 40 blez zo ma vez Gwened hag an tolpad-kêrioù é tridal get ar sonioù jazz en arbenn ag aozadur daou festival er gouiañv hag en hañv. Bremañ ma vo roet lañs da Gwened Dasson Jazz e vo swing a-hed ar blez.

Bout tañvaet douster sonadegoù noz « Jazz e kêr » bep hañv e liorzh ar Ramparzhioù a vehe kaoz ? Pe e vehe efed an dalc’hoù klev nes bet saouret en unan ag ar c’humunioù ma oa aozet ar « Goañvadoù jazz » ? Sur ased eo en deus merket ar stil sonerezh-se e louc’h àr hor c’hornad-bro a-c’houde 1980 ha derc’hel a ra d’ober muioc’h-mui.

Anavoet ar jazz en ur mod-arall

Dre roiñ lañs da « Gwened Dasson Jazz » e vo kadarnaet merk ar sonerezh-se àr an tolpad get ur programm liesdremm a-hed ar pevar c’houlz-blez. Bec’h dezhi get ar jazz, sonerezh emdroüs, kemmesk. Durant ar mizioù kentañ e vo un droiad hanterouriñ ma vo kinniget d’an dud donet da gendiviz, da c’hoari, da zañsal, da grouiñ traoù àr dachenn ar jazz. Dait get ho pladennoù vinil enta, get ho penvegoù-sonerezh pe digorit ho tiskouarn ha traken, sur a-walc’h e vo un emgav evidoc’h e-tal ar gêr !

Da-geñver devezh etrebroadel ar jazz en nevezamzer e vo diskouezet d’an dud labour ar skoliaded sevenet e-pad ar blez a-zivout sonerezh ar frankizoù. D’an 18 a viz Ebrel 2024 e vo kinniget o fodskignadoù da-geñver abadennoù aozet evit an devezh-se  harpet get an UNESCO.

Dalc’h kentañ « Gwened Dasson Jazz » an hañv a vo aozet etre ar 15 hag an 20 a viz Gouere, get sonadegoù digoust er-maez, kement hag endevout ho kwalc’h a zizoloadennoù kaer hag a brantadoù etre daou.  Er gouiañv e tay ar jazz en-dro e miz an Azvent-mañ ’za da-geñver an abadennoù « Christmas Deiz » evit un droiad get tonioù a bep sort e meur a gumun ag an tolpad.  Evel ar stil sonerezh a zo ag ar jazz, e vo roet lec’h bras d’an traoù graet a-benn-kaer get an aozadur nevez-se :   Tonket eo « Gwened Dasson Jazz » da greskiñ ha da chañch hervez ar c’hinnigoù hag an digarezioù arzel a vo er c’hornad.  Get sonioù elektro, afro, rock pe bebop, e vimp bamet get ar jazz c’hoazh e-pad pell.

Muioc’h a ditouroù ha razh an doareioù a-ziàr Gwened Dasson Jazz e www.vannesechosjazz.bzh

Digoradur Gwened Dasson Jazz